சூப்பர் ஸ்டார் ரஜினி அளவிற்கு திரையுலகின் லேட்டஸ்ட் டிரென்ட்டை தெரிந்துவைத்திருப்பவர்கள் தமிழ் சினிமாவில் எவரும் இருக்க முடியாது. கோலிவுட், டோலிவுட், பாலிவுட், ஹாலிவுட் என அனைத்து கனவுத் தொழிற்சாலைகளின் லேட்டஸ்ட் ஹிட்களும் பிளாப்களும் இவருக்கு அத்துப்படி. 35 வருடங்களுக்கும் மேல் தனது சூப்பர் ஸ்டார் நாற்காலியை இவர் தக்க வைத்துக்கொண்டுள்ளதர்க்கு இப்படி இவர் அப்டேட்டாக இருப்பதும் ஒரு காரணம்.

எந்த ஒரு சக நடிகரின் படமும் நன்றாக இருப்பதாக கேள்விப்பட்டால், சிறிதும் ஈகோ பார்க்காது அந்தப் படத்தை பார்த்துவிடுவார். இந்த வழக்கம் பெரும்பாலான நடிகர்களிடம் கிடையாது. ஆகவே தான் ஒரே சாயல் கொண்ட படங்களை சில நடிகர்கள் நடிக்க நேர்ந்துவிடுகிறது. (நம்மளை சுத்தி நடக்குற விஷயம் என்னன்னு தெரிஞ்சா தானேங்க சர்வைவ் பண்ணமுடியும்?)

அவர் படம் பார்ப்பதற்கென்று ஒரு ஸ்டைல் இருக்கிறது. பெரும்பாலும் நுங்கம்பாக்கத்தில் உள்ள ஃபோர் பிரேம் திரையரங்கில் தான் அவர் படம் பார்ப்பது வழக்கம். ஃபோர் பிரேமில் அவர் படம் பார்க்கிறார் என்றால், குறைந்தது அவரது குடும்பத்தினர், நெருங்கிய நண்பர்கள், அவர் தம் குடும்ப உறுப்பினர்கள் என குறைந்தது 20 பேராவது அவருடன் படம் பார்ப்பார்.

அடுத்து, மாறு வேடம். குறிப்பிட்ட ஒரு படத்தினுடைய பொது மக்களின் ரெஸ்பான்ஸ் எப்படி இருக்கிறது என்று தெரிந்துகொள்ள விரும்பினால் - அது எந்த நடிகரின் படமாக இருந்தாலும் சரி - மாறுவேடத்தில் மக்கள் அதிகளவு வரும் பிரபல திரையரங்கம் ஏதாவது ஒன்றுக்கு சென்று மக்களோடு மக்களாக படம் பார்ப்பார். இந்த மாதிரி நேரத்தில் அவருடன் அவரது நெருங்கிய நண்பர் எவராவது ஒருவர் உடன் செல்வது வழக்கம். அவரும் மாறுவேடத்தில் தான் இருப்பார் என்பது தான் இங்கு சுவாரஸ்யமான விஷயம்.

அடுத்து இன்னொரு ஸ்டைல் இருக்கிறது. குறிப்பிட்ட ஒரு திரையரங்கில் ஒரு படத்தை அதன் பக்கா எபக்ட்டோடு பார்க்கவேண்டும் என்று விரும்பினால் - அவர் கையாளும் முறை. படம் துவங்குவதற்கு முன்னரே சம்பந்தப்பட்ட் திரையரங்கிற்கு சென்றுவிடுவார். அவர் வருவது திரையரனின் உரிமையாளருக்கோ அல்லது நிர்வாகிக்கோ மட்டும் தான் தெரியப்படுத்தப்படும். அவர்கள் ஒரு நல்ல மூலையில், ஒரு நான்கைந்து சீட்டுக்களை கார்னர் செய்துவைத்துவிடுவர். இவர் படம் துவங்குவதற்கு முன்னரே குறிப்பிட்ட அந்த திரையரங்கிற்கு சென்று ஓரமாக அமர்ந்துவிடுவார். படம் துவங்கியப்பினர் முழு படத்தையும் ரசிப்பார். மற்றவர்கள் படத்தை ரிசீவ் செய்யும் விதத்தையும் கவனிப்பார். படம் முடிவதற்கு சற்று முன்னர் வந்து சுவடு தெரியாமல் கிளம்பிவிடுவார்.

மிகப் பெரிய வி.வி.ஐ.பி. ஒருத்தரு நம்மோட உட்கார்ந்து படம் பார்த்திருக்காரு என்கிற விபரமே அந்த ஆடியன்ஸ்க்கு கடைசி வரைக்கும் தெரியாது. (இப்படி அவர் படம் பார்க்கும்போது ஒரு சிலர் அவரை கவனித்துவிட்ட சம்பவங்களும் நடந்துள்ளது.)

சூப்பர் ஸ்டார் இந்த கடைசி ஸ்டைலில் சமீபத்தில் பார்த்த படம் - பெரிய எதிர்பார்ப்பில் வெளியாகி, சக்கை போடு போட்டுக்கொண்டிருக்கும் ஹாலிவுட் படம் - THE AVENGERS. படம் பார்த்த திரையரங்கம்… சத்யம் வளாகத்தில் உள்ள சாந்தம்.

சென்ற வாரத்தில் ஒரு நாள் - படம் துவங்குவதற்கு முன் வந்தவர் ஓரமாக சென்று அமர்ந்துகொண்டார். முழு படத்தையும் ரசித்தவர், படம் முடிவதற்கு சற்று முன்னர் கிளம்பிச் சென்றார். அந்தக் ஷோவை ரசித்துக்கொண்டிருந்தவர்களுக்கு மிகப் பெரிய புள்ளி ஒருவர் நம்முடன் படம் பார்த்துக்கொண்டிருந்தார் என்ற விபரம் கடைசி வரை தெரியாமலே போனது.

அது சரி… தலைவர் ஏன் AVENGERS படத்தை பார்த்தாரு?

படத்தை நீங்க ஒரு தடவை பாருங்க. புரிஞ்சுக்குவீங்க!

[END]